ដោយ: តែម សុខុម
ភ្នំពេញ: តុលាការឧក្រិដ្ឋកម្មអន្តរជាតិ ICC ដែលមានមូលដ្ឋាននៅទីក្រុងឡាអេ (The Hague) ប្រទេសហូឡង់ ដែលមាន១២៥ប្រទេសជាសមាជិក ត្រូវបានបង្កើតឡើងក្នុងគោលបំណងផ្តល់ក្តីសង្ឃឹម និងស្វែងរកយុត្តិធម៌ ជូនជនរងគ្រោះរាប់លាននាក់ទូទាំងពិភពលោក ដែលទទួលរងអំពើឃោរឃៅយង់ឃ្នងហួសពីការស្មាន។
ដូចនេះ តើវាជារឿងគូរឱ្យអស់សំណើចទេ ដែលប្រធានាធិបតីអាម៉េរិក លោក ដូណាល់ ត្រាំ បានប្រកាសដាក់ទណ្ឌកម្មលើចៅក្រម៤រូបនេះនៅតុលាការឧក្រិដ្ឋកម្មអន្តរជាតិICC?។
ជាការពិតណាស់ លោក ដូណាល់ ត្រាំ ប្រធានាធិបតីទី៤៧ របស់សហរដ្ឋអាម៉េរិក ដែលជាមហាអំណាចធំបំផុតរបស់ពិភពលោក ច្រើនតែធ្វើអ្វីប្លែកៗ ដែលធ្វើឱ្យពិភពលោកភ្ញាក់ផ្អើលជាហូរហែរ ហើយកាលពីថ្ងៃព្រហស្បិ៍ ទី៥ ខែមិថុនា លោកបានធ្វើឱ្យពិភពលោកភ្ញាក់ផ្អើលជាថ្មីទៀតហើយ នៅពេលដែលរដ្ឋបាលរបស់លោក សម្រេចដាក់ទណ្ឌកម្មលើចៅក្រម៤រូបនេះ នៅតុលាការឧក្រិដ្ឋកម្មអន្តរជាតិ ICC។ នេះបើយោងតាមការចុះផ្សាយរបស់សារព័ត៌មាន Nikkei Asia នៅថ្ងៃសុក្រ ទី៦ ខែមិថុនា។
ក្រុមអ្នកឃ្លាំមើលស្ថានការណ៍យល់ថា ចំណាត់ការនេះទំនងជាការសងសឹក ចំពោះតុលាការអន្តរជាតិមួយនេះ ដែលធ្លាប់បានចេញដីកាចាប់ខ្លួននាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) និងដែលធ្លាប់បានបើកសវនាការជំនុំជម្រះ សំណុំរឿងឧក្រិដ្ឋកម្មសង្គ្រាមមួយ ដែលប្រព្រឹត្តដោយទាហានអាម៉េរិក នៅក្នុងប្រទេសអាហ្វហ្គានីស្ថាន។
រដ្ឋមន្ត្រីការបរទេសអាម៉េរិក លោក ម៉ាកូ រូប៊ីអូ (Marco Rubio) បានចេញសេចក្តីថ្លែងការណ៍ថា ក្រុងវ៉ាស៊ីនតោន បានសម្រេចដាក់ទណ្ឌកម្ម លើចៅក្រមចំនួន៤រូបនេះ នៅតុលាការឧក្រិដ្ឋកម្មអន្តរជាតិICC រួមមាន ចៅក្រមនៃប្រទេសអ៊ូហ្គង់ដា ចៅក្រមនៃប្រទេសប៉េរូ ចៅក្រមនៃប្រទេសបេនីន (Benin) និងចៅក្រមនៃប្រទេសស្លូវេនី។
រដ្ឋមន្ត្រីការបរទេសអាម៉េរិក រូបនេះបានលើកឡើងតាមរយៈសេចក្ដីថ្លែងការណ៍ខាងលើថា ចៅក្រមនៅតុលាការឧក្រិដ្ឋកម្មអន្តរជាតិ ICC ទាំង៤រូបនេះ បានចូលរួមក្នុងបណ្ដឹងដ៏អយុត្តិធម៌ និងគ្មានមូលដ្ឋានរបស់តុលាការឧក្រិដ្ឋកម្មអន្តរជាតិICC ប្ដឹងសហរដ្ឋអាម៉េរិក និងប្រទេសអ៊ីស្រាអែល ដែលជាសម្ព័ន្ធមិត្តរបស់ខ្លួន។
លោកបានបន្ថែមថា តុលាការឧក្រិដ្ឋកម្មអន្តរជាតិICC មានភាពលម្អៀងផ្នែកនយោបាយ ហើយបានអះអាងទាំងខុសឆ្គងថា ខ្លួនមានអំណាច ឬ យុត្តាធិការគ្មានដែនកំណត់ ក្នុងការបើកការស៊ើបអង្កេត ធ្វើការចោទប្រកាន់ និងកាត់ទោសជនជាតិអាម៉េរិក និងបណ្ដាសម្ព័ន្ធមិត្តរបស់សហរដ្ឋអាម៉េរិក។
ទណ្ឌកម្មទាំងនេះ រួមមាន ទាំងការបង្កកប្រតិបត្តិការហិរញ្ញវត្ថុរបស់ចៅក្រមទាំងនេះ នៅតាមធនាគារនានា ដែលមានទំនាក់ទំនងជាមួយសហរដ្ឋអាម៉េរិក ឬការធ្វើប្រតិបត្តិការជាប្រាក់ដុល្លារអាម៉េរិក ពោលគឺធ្វើឱ្យចៅក្រមទាំងនេះ ពិបាកនឹងប្រើប្រាស់ប្រព័ន្ធធនាគារអន្តរជាតិ ដែលភ្ជាប់ទៅនឹងប្រាក់ដុល្លារអាម៉េរិក។
ជាការឆ្លើយតប តុលាការឧក្រិដ្ឋកម្មអន្តរជាតិ ICC បានថ្កោលទោសការដាក់ទណ្ឌកម្មនេះ ដោយនិយាយថា ទង្វើនេះជាការប៉ុនប៉ងបំផ្លាញឯករាជភាព នៃស្ថាប័នតុលាការអន្តរជាតិ ដែលផ្តល់ក្តីសង្ឃឹម និងយុត្តិធម៌ដល់ជនរងគ្រោះ រាប់លាននាក់នៃអំពើឃោរឃៅយង់ឃ្នងហួសពីការស្មាន៕
