ដោយ: តែម សុខុម
ភ្នំពេញ: ប្រទេសហ្វីលីពីន ដែលជាអ្នកនាំចូលអង្ករធំជាងគេបំផុតលើពិភពលោក កំពុងសម្លឹងឈោងចាប់ទីផ្សារថ្មីៗ រួមទាំងកម្ពុជា ផងដែរដើម្បីកាត់បន្ថយការនាំចូលអង្ករ ពីប្រទេសវៀតណាម ដែលជាអ្នកផ្គត់ផ្គង់អង្ករដ៏ធំបំផុតរបស់ខ្លួន។
មន្រ្តីហ្វីលីពិនបាននិយាយថា ការសម្លឹងឈោងចាប់ទីផ្សារថ្មីៗនេះ គឺរក្សាស្ថិរភាពតម្លៃ និងស្ថិរភាពនៃការផ្គត់ផ្គង់។ នេះបើយោងតាមការចុះផ្សាយ របស់សារព័ត៌មាន Business Times កាលពីថ្ងៃច័ន្ទ ទី០២ ខែមិថុនា។
រដ្ឋមន្ត្រីក្រសួងកសិកម្មហ្វីលីពីន លោក ហ្វ្រានស៊ីស្កូ ទីវ ឡូរែល (Francisco Tiu Laurel) បាននិយាយថា ហ្វីលីពីន កំពុងពិភាក្សា ជាមួយក្រុមហ៊ុននាំចូលឯកជននានា អំពីការទិញអង្ករពីប្រទេសឥណ្ឌា ប៉ាគីស្ថាន មីយ៉ាន់ម៉ា និងកម្ពុជា ហើយក៏កំពុងស្វះស្វែងចុះកិច្ចព្រមព្រៀង ជាមួយប្រទេសឥណ្ឌូនេស៊ី និងថៃ ផងដែរ។
រដ្ឋមន្ត្រីក្រសួងកសិកម្មហ្វីលីពីន និយាយថា បច្ចុប្បន្នវៀតណាម ផ្គត់ផ្គង់រហូតដល់ទៅ៩០% នៃការនាំចូលអង្ករសរុបរបស់ប្រទេសហ្វីលីពីន ហើយថា វាមានហានិភ័យខ្ពស់ណាស់ ប្រសិនបើមានបញ្ហាផ្គត់ផ្គង់ណាមួយកើតឡើង។
អង្គការស្បៀង និងកសិកម្មនៃសហប្រជាជាតិ (FAO) ឱ្យដឹងថា តម្លៃអង្ករវៀតណាម នាពេលថ្មីៗនេះ បានហក់ឡើងដល់កម្រិតខ្ពស់បំផុតមិនធ្លាប់មាន ក្នុងរយៈពេល៣ខែមកនេះដោយសារតម្រូវការកើនឡើង។
ប្រធានាធិបតីហ្វីលីពីន លោក ហ្វឺឌីណង់ ម៉ាកូស (Ferdinand Marcos) បានលើកឡើងថា ការធ្វើឱ្យតម្លៃចំណីអាហារ ធ្លាក់ចុះទាបគឺជាកិច្ចការដ៏សំខាន់។ រដ្ឋាភិបាលរបស់លោកបានកាត់បន្ថយពន្ធនាំចូលអង្ករ ពី៣៥%មកនៅត្រឹម១៥%កាលពីឆ្នាំមុន ហើយបានប្រកាសអាសន្ន សន្តិសុខស្បៀងកាលពីអំឡុងខែកុម្ភៈ។
លោកបញ្ជាក់ថា “វិធានការទាំងនេះ បានជួយកាត់បន្ថយអតិផរណាឱ្យធ្លាក់ចុះ ដល់កម្រិតទាបបំផុត មិនធ្លាប់មានចាប់តាំងពីឆ្នាំ២០១៩ មក”។
រដ្ឋមន្ត្រីក្រសួងកសិកម្មហ្វីលីពីន រំពឹងថា ប្រទេសហ្វីលីពីន នឹងនាំចូលអង្ករ មិនឱ្យលើសពី៤,៥លានតោន នោះឡើយសម្រាប់ឆ្នាំ២០២៥ នេះ បើធៀបនឹងចំនួន៥,៤លានតោនដែលត្រូវបានព្យាករដោយក្រសួងកសិកម្មអាម៉េរិក៕
