ដោយ: តែម សុខុម
ភ្នំពេញ៖ ប្រទេសកាន់តែច្រើននៅអាស៊ី កំពុងពន្លឿនការធ្វើបដិដុល្លារនីយកម្ម ឬកាត់បន្ថយការពឹងផ្អែក លើប្រាក់ដុល្លារអាម៉េ រិក សម្រាប់ការទូទាត់ពាណិជ្ជកម្មអន្តរជាតិ តាមរយៈការបង្កើតកិច្ចព្រមព្រៀងពាណិជ្ជកម្មថ្មីៗ និងការបង្កើនការវិនិយោគរបស់ខ្លួនលើទ្រព្យសកម្មផ្សេងៗ ដូចជាមាស ប្រាក់យន់ ចិន និងរូបិយប័ណ្ណឌីជីថល ដូចជា Bitcoin ជាដើម។
កត្តាចម្បងៗដែលជំរុញឱ្យប្រទេសកាន់តែច្រើន ពន្លឿនការធ្វើបដិដុល្លារនីយកម្មរួមមាន ដូចជា កត្តាទណ្ឌកម្ម កត្តាពន្ធគយ និងកត្តានៃការកើនឡើងភាពតានតឹងទូទាំងពិភពលោក។
អ្វីដែលជាការកត់សម្គាល់ឃើញថា សិង្ហបុរី ឥណ្ឌូណេស៊ី និងជប៉ុន ស្ថិតក្នុងចំណោមប្រទេសទាំង១០ ដែលសម្រេចបានវឌ្ឍនភាពច្រើនជាងគេបំផុតនៅក្នុងការធ្វើបដិដុល្លារ នីយកម្មនេះ។ នេះបើយោងតាមការចុះផ្សាយរបស់សារព័ត៌មាន South China Morning Post កាលពីថ្ងៃទី៣០ ខែឧសភា។
ការសិក្សាថ្មីមួយធ្វើឡើងដោយ Forex Complex ដែលជា Platorm ផ្ដល់ការអប់រំ និងការវិភាគការជួញដូររូបិយប័ណ្ណអន្តរជាតិបង្ហាញថា ការធ្វើបដិដុល្លារនីយកម្ម កំពុងកើនឡើងគួរឱ្យកត់សម្គាល់នៅអាស៊ី។
ការសិក្សាថ្មីនេះ បានគូសបញ្ជាក់ពីសូចនាករសំខាន់ៗ ចំនួន៣ នៃបដិដុល្លារនីយកម្មនេះ ដោយទី១ ការកាត់បន្ថយចំណែកប្រាក់ដុល្លារអាម៉េរិក នៅក្នុងទុនបម្រុងរបស់ជាតិ ទី២ ការបង្កើនចំណែកមាសក្នុងទុនបម្រុងរបស់ជាតិ និងទី៣ ការប្រើប្រាស់រូបិយប័ណ្ណផ្សេងៗកាន់តែច្រើនឡើង នៅក្នុងការទូទាត់ពាណិជ្ជកម្មទ្វេរភាគី។
លោកគ្រីស ឡច (Chris Lodge) អនុប្រធានក្រុមហ៊ុនកម្រៃជើងសារជួញដូររូបិយប័ណ្ណបរទេស FXTM បានលើកឡើងថា បណ្តាប្រទេសនៅអាស៊ី ចង់កាត់បន្ថយការពឹងផ្អែក លើប្រាក់ដុល្លារអាម៉េរិក ជាពិសេសដោយសារតែកត្តាទណ្ឌកម្ម កត្តាពន្ធគយ និងកត្តានៃការកើនឡើងភាពតានតឹងទូទាំងពិភពលោក។
អ្នកជំនាញរូបនេះបានគូសបញ្ជាក់ថា ខណៈដែលប្រាក់ដុល្លារអាម៉េរិក នៅតែបន្តឈានមុខគេ នៅក្នុងការទូទាត់ពាណិជ្ជកម្មអន្តរជាតិទូទាំងពិភពលោក ដោយប្រាក់ដុល្លារអាម៉េរិក ត្រូវបានប្រើប្រាស់ស្ទើរតែពាក់កណ្ដាល នៃការទូទាត់តាមប្រព័ន្ធទូទាត់អន្តរជាតិSWIFT និងជាង៨០% នៃការជួញដូររូបិយប័ណ្ណបរទេស ប្រទេសកាន់តែច្រើនឡើងនៅតំបន់អាស៊ីអាគ្នេយ៍ មជ្ឈិមបូព៌ា និងក្នុងចំណោមប្រទេសក្នុងប្លុកប្រទេស BRICS កំពុងងាកទៅប្រើប្រាស់រូបិយប័ណ្ណផ្សេងជាជាងប្រាក់ដុល្លារអាម៉េរិក កាន់តែសម្បូរបែប។
លោកបានបន្ថែមថា នៅអាស៊ី ប្រតិបត្តិការទូទាត់ពាណិជ្ជកម្មទ្វេភាគីកាន់តែច្រើនឡើង កំពុងត្រូវបានធ្វើឡើងជាប្រាក់យន់ របស់មហាយក្សចិន បន្ទាប់មកគឺប្រាក់អឺរ៉ូ និងបន្ទាប់មកទៀតគឺប្រាក់ដឺហែម (Dirham) នៃប្រទេសអេមីរ៉ាតអារ៉ាប់រួម៕
